Munnabhai MBBS ki Paathshala!

Scene 1: Munnabhai with Circuit & Short-circuit in the market

Vegetable vendor : Bhaji lelo.. Gobhi.. Karela.. Kaddu.. Lauki.. Gajar.. Bhindi! Jisko jo pasand aaye, wo le lo!

Circuit : Mujhe to gajar hi pasand hai, uff taaze gajar ka halwa.. wah wah! Ye karela to itna kadva hota hai ki main chakhu bhi na!!

Bhai : Ae circuit, tujhe gajar pasand hoga, lekin ye samajh le acha aur bura apne mann mein hi hai, sabji mein nahi!

Circuit: Chalo chhodo na Bhai! Ye batao, market mein to sab kuch mil jata hai... Jab duniya bhar ki saari cheeze milti hai to khushi bhi khareed hi sakte hai.. Kya hai na Bhai aaj subah se short-circuit ka thobda thoda down lag raha hai...

Bhai: arre haan bilkul, tujhe khush hone ke liye kya chahiye bata short-circuit, apun tereko khareed ke deta hai...

Circuit: Bhai, sach-much; mere ko bhi ha?

Bhai: tu bhi kya yaad rakhega circuit?

Short-Circuit : Bhai, mujhe ek smart-phone chahiye.. iPhone 7s

Circuit: Bhai, mujhe ek 5-star mein lunch- bas, apna kaam itne mein ho jayega 

Bhai: chal, tum dono ko apun khush kar dega aaj...

Scene 2: At lunch table after purchasing the iPhone

Bhai: kya short-circuit, ye iPhone to bhaari chez hai.. Apun ko to maloom hi nahi tha ki ye khaya hua apple ka company aisa mehanga phone bhi banata hai

Short-circuit: haan Bhai, iska owner woh Steve Jobs, purush hi nahi, mahapurush tha 

Bhai: tu 100% khush hai na?

Short-circuit: Bhai, 50% sirf 

Bhai: kyu be? iPhone ke baad bhi?

Short-circuit: apun ke samne baithke ye circuit chinese chilly paneer daba raha hai aur apun sirf ye nimbu soda chus raha hai, aur kya hoga Bhai?

Bhai: Khushi iPhone se nahi, apne ko kitna chahiye aur kitna mila, usse pata lagti hai… jab tere ko ek aur cheez chahiye… Teri khushi half ho gayi na?

Circuit: oye, tereko control to hai nahi… kal sham ko 4 wada-pav pet mein thusne ke baad, subah se dast lage hai is liye tera thobda down tha na, aur abhi tu chinese khayega?

Bhai: dekh short-circuit, life mein kabhi bhi do raaste milenge- ek abhi ekdum fast forward mein apne ko khush kar dega lekin aage long term ke liye apni gaadi atak sakti  hai... doosra shuruat mein thoda fight hoga, lekin aage ekdum makkhan mafik smooooth... ab tu bata, chinese khayega ya nimbu-soda mein khush hai?

Short-circuit: Bhai sahi keh rahe ho, lekin kya bolega, abhi tak sochrela hai, kya karne ka?

Bhai: dekh, koi bhi decision lene ka na to pehle buddhi ki sunne ka, mann to chanchal hota hai re, apne ko buddhi ke control mein rahne ka... Nahi to life ekdum alag patri par chala jayega aur apne ko pata bhi nahi chalega

Short-circuit: Bhai, sahi bole, chinese ko maro goli.. nimbu soda mein hi khush hu main.. Cheers!

Circuit/Bhai: cheers! Ye hui na baat short-circuit!!!

(Waiter slips on wet floor & mistakenly drops tea on Bhai’s shirt)

Circuit: Ae waiter dikhta nahi hai kya, du kya ek rakh ke? Bhai ki jhakaas shirt pe chai gira diya?

Short-circuit: Bhai, main isko chhodega nahi, mera mann bolta hai iski hadi-pasli ek kar dalega…

Bhai: Circuit/ short-circuit, shaant rehne ka thoda, mann jaisa bolega karenge to buddhi hone ka kya faayda? Abhi last week hi Bapu ka birday gaya hai, Bapu apun ko yehich sikha ke gaya hai ki himsa se kaam nahi hone ka...

Waiter: Bhai, sorry, maaf kar dena, wo yahan par jameen gili hone ki wajah se thoda balance bigad gaya…

Bhai: Dekho, isme iski kya galti? Apne ko pehle sahi cheez janne ka, aur uske baad hi buddhi ko sahi decision lene ka; mann to sirf buddhi ka naukar hona chahaiye – jaisa buddhi bolne ka, waisa mann ko karne ka..

Short- circuit: Bhai, par ye waiter bhi na, apun ko thoda thakela lagta hai… warna 5-star ka training ke baad bhi fisal gaya.. apun to abhi isko iske kitchen ki bhatti mein bhun dalega..

Bhai: Dekho, itna sab bolne ke baad bhi agar mann ko doubt lag raha hai, to khud ke hardware mein hich kuch problem lag raha hai.. kuch to virus aisa chipak gaya hai ki chhodne ka naam hi nahi le raha hai!

Apne ko pehle mann ko thoda shaant karne ka practice karna padega. Bapu ka life story padhne ka, uske jaisa doosre logo ka bhi history/ geography samajhneka, lonavla ke thande mahol mein jaake chup-se baithneka aur mann ko shaant rehna ka sikhaneka

Circuit: Bhai, apun se ye sab nahi hota hai, apun ko to upar wale ne kuch alag hi banaya hai.. apun to jab akela bhi rehta hai, mann marathon mein hi daudta rehta hai – apun to kabhi nahi kar payega.. ye sab apni kismat mein nahi hai!

Bhai: Circuit, kabhi tu motor boat dekha hai kya, kaise fat-fat karke paani ke bahav ko todke aaga nikal jata hai.. chahe jitni bhi toofani lehrein ho. Apna life bhi waisaich hai, apni kismat mein jo likha hai, wo to hoke hich rahega lekin apun ko bhi fight marna jaroori hai- apun aaj jo karega, uska kal thoda to faayda hoga! Agar boat apna motor chalu hi nahi karegi, to phir to pani jaise ja raha hai waise hi chali jayegi

Circuit: Sahi bole bhai, apna to naam bhi circuit hai, motor kabhi to chalu karna padega..

Short-circuit: But Bhai, lagta hai apna motor chalu hone ke baad band ho gaya, apun short-circuit hai na.. haha!

Bhai: haha short-Circuit, chalu kar de phir se… warna life ki boat kabhi bhi doob sakti hai!

Scene 3: Bapu arrives with ‘Bande mein tha dum’ in background

Bapu : Munna… achcha kar rahe ho ki sabhi ko meri seekh bata rahe ho! Tum khud bhi is path par chalna shuru kar do!! Ab ye bhaigiri chhodkar, khud bhi asli mein MBBS ban jao, sirf naam se nahi! Zindagi mein uncha socho aur bade bano!

Bhai: Arre Bapu aap, maine to bhaigiri chhodkar Gandhigiri shuru kar di hai... aap dekh hi rahe ho! Mujhe to laga tha ki meri pathshala khatam ho gayi thi… lekin aisa lag raha hai ki meri parisha ab bhi baaki hai.. aur bataiye na kya sikhna baaki hai?

Bapu: Tujhe abhi khud ke gyan ki baatein janna jaroori hai!

Bhai: Arre Bapu, ye sab to 50 saal ki umra tak ruk sakta hai! Abhi to kaafi zindagi baaki hai! Thode time ke baad uska bhi time aayega.

Bapu: Nahi Munna… iska time yahi hai aur abhi hai, abhi nahi to kabhi nahi! Soch, jo tu ab tak samajh raha hai ki asli duniya hai, wo sach mein asli hai kya? Tu abhi tak so to nahi raha tha, aur so raha tha to asli mein jagna kaisa hota hoga? Tujhe ek kitaab deta hu, ye padh le aur is sabka jawab mil jayega!

Bhai: Bapu.. Ye Geeta!?

Bapu: Haan Munna.. Maine kai saal pehle, is par apne kai vichar anek logon ko bhi bataye hain... Ise padh aur tu sach ka MBBS ban jayega – teri zindagi mein koi virus nahi rahega aur tu doosro ke virus ko bhi mita payega!

Bhai: Bapu.. lagta hai aap apun ko khud ke jaisa hi bana rahe ho!

Bapu: Tujh mein to main hi hu, main to sirf tujh se ‘main’ ko hata rah ahu, taaki tu asli khud ko jaan jaye!

Bhai: Bapu! Maan gaye… Vande Mataram!!!

(A modified version of this skit was performed on 9th Oct'16 as part of the  graduation ceremony of the Foundation Vedanta course)